I hab die Aschen von mein Burnout entsorgt
Sie war no haaß
Der ganze Schaaß
Fangt an zum brennen
Und wie des raucht
Und wie des stinkt
Des war scho oarg
Aber i hab's mit a paar Kriagl löschen können

Refrain
In mein Hirn die Chemie
Die begreif i wohl nie
Wann die Neuro-Transmitter spinnen
Und die Synapsen kollapsen
Dann kann i mi nie
Ans banale Normale erinnern

Da schleicht si scho der nexte Huscher au
Die Depri schliaft ma
Immer tiafer
I bin dämpft
Mei Schedl scheppert
I werd deppert
Und es zipft mi au
Aber i hab's mit a paar Jollies niederkämpft

Refrain

I werd des ganze Leben afoch vermeiden
Weul es macht unrund
Und ungsund
Und afoch nur krank
I habs begriffen
Wie die Wiffen
Und die angeblich Gscheiten
Es gibt fia alles a Pulverl, Gott sei Dank

Refrain