I hab nur a Herz
Fia vü z'vü zum Gernhabn
Söbst des is scho brochn
In tausende Teul
Aber find't so a Splitter
So a Trumm von wen andern
Dann ham sa si gern
Bis ois wieder verheilt

I hab nur a Hirn
Fia vü z'vü zum Denken
Fia so vü Ideen
Die mir wirklich gfalln
I waaß nie was is wichtig
I waaß nie was is richtig
I verrat eich an Schmäh:
A bissl von oin

I hab nur zwa Fiaß
Fia vü z'vüle Straßn
Und an aaner Kreuzung
Kann i nur an Weg geh
Hauptsach, dass de Richtung
Mi hin zu mein Ziel führt
Und ob der Weg net scho 's Zü is
Des merk i dann eh

I hab nur an Oasch
Fia vü z'vüle Kirtag
I werd mi net z'sprageln
I tanz halt niangs mit
Aber gibt's wo 2 Sessel
Setz i mi dazschwischn
Auf mein eigenen Stockerl
Und dann sitz ma zu dritt

A jeder mit an Herz
A jeder mit an Hirn
Jeder sitzt auf sein Oasch
Weul kaaner hat mehr
Und wann des wer net glaubt
Hat a jeder zwaa Fiaß
Zum Aufsteh und furtgeh
Tschüss mit Ü, bitte sehr !

Jeder hat a Herz
Jeder hat a Hirn
Jeder sitzt auf sein Oasch
Und kaaner hat mehr
Und wann des wer net glaubt
Dann hab i zwaa Fiaß
Zum Aufsteh und furtgeh
Tschüss mit Ü, bitte sehr !