Vorstadt-Blues (© by Ko-Do 2009)
Da ostbahn-kurti singt von favoritn Von d'hackler, was durt wohnen und vom blues Espresso Rosi, des is durt a steule hüttn Wo's kurti-semmeln gibt und wodka-juice Den kaisermühlen-blues, den zeigns im fernsehn Des lebn, vom hinterberger schee drapiert Warum den gar so vüle leut aa wirklich gern sehn Habns ziemlich sicher sölber net kapiert Des is nix neichs, den mundl hats scho lang gebn Und den herrn karl und den travnicek – und mi Wird zeit, dass ma dem oidn zeigs den hau gebn A neicha vorstadt-blues muaß her – und den spü i I sing eich liada von an liabn klaanan beisl Wo d'hackler darts spün, dazua trinkns wodka-juice Do wern no kinder gmacht auf schnö am damen-heisl 9 monat später hams dann kloaraweis den blues Oder vom sandler, der do wohnt unter da bruckn Wannst eam a bier zoin wüßt, nimmt er's net an vur stoiz Da gibt's ka knian, ka oaschkreun und ka duckn Ja in da vorstadt san de leit aus so an hoiz		De hochn viecha kumman aa vurbei wann woin san Dann gibt's im beserl-park a bierzöt und musik Da herr minister schüttelt händ, und wanns dann zoin tan Dann leichtn ihre augn vur lauter glick Beim oidn trafikant gibts marlboro auf aufschreibn Am 7. kummt da notstand, dann wird blecht Er waaß genau, de gradn wern net ausbleibn Und von de krummen wird eam aa scho nimma schlecht Sogoa a kirchn gibz, de net amoi ganz leer is Weu da herr pfarrer "don camillo" angschaut hat Er schaut auf seine schäfchen, aa wanns schwer is Und hüft eana durchs leben mit rat und tat Und aa mit manche vun da he loßt si guat redn De mochn aa nua eanan job – net imma leicht "hirn obe, kappl auf" güt net fia jedn Und olle in an topf haun is zu seicht I kennt no vü dazöln und stundnlang no singa So richtig neich is oba aa net – oiso schluss ! De köllnerin soi mir a kriagl bringa Des is de letzte zeuln vom vorstadt-blues